jueves, 22 de diciembre de 2016

IALMA PERCORRE,CANTANDO, NO "CAMIÑO" DE BRUXELAS E SANTIAGO



Este grupo de cantareiras formado por Verónica Codesal, Natalia Codesal, Magali Menéndez e Marisol Palomo viven en Bruxelas pero manteñen unha relación, un vínculo vital con Galicia, a súa principal fonte de inspiración, á que cantan desde fai case vinte anos. Unhas cantigas coas que mostran, desde a "emigración", o seu amor pola terra da que xa deixaron constancia na gravación do seu primeiro disco, "Palabras darei"  sendo un quinteto no ano 2.000 ao que despois seguirían "Marmuladas" (2002),"Nova Era" (2007) e "Simbiose" (2011).


Este grupo de pandereteiras galego-belgas, Ialma, reemprende agora o "Camiño (de Bruxelas a Santiago)", así se chama o seu quinto disco, no que as voces tradicionais características das cantareiras  fusiónanse con sons, melodías e arranxos máis modernos, dando cancións moi frescas e vivas, que son unha combinación intelixente para unha renovada música universal con algunhas conexións célticas

 Un novo disco no que contan a súa historia e a das súas familias e no que queren facer unha homenaxe aos galegos e galegas da emigración. "Camiño", é a historia da súa emigración e da dos seus pais, pero que segue a evolucionar "porque un camiño nunca se para", din. "É un camiño de loita, cultural, de diversidade, de descubrir e de contactar co público e coa xente doutras culturas. É un camiño que levamos percorrendo moitos anos e que cantamos a través das nosas cantigas". 

O novo disco tamén é un canto á diversidade: "Descubrirmos novas culturas musicais permítenos enriquecernos e coñecernos mellor", afirman, definindo así a evolución que fixo o grupo que contribuíu a perpetuar, renovar e facer evolucionar a música tradicional galega.


O traballo inclúe 13 temas, algúns tradicionais e outros de feitura ‘tradicional’ con letras contemporáneas, de autor, a cargo de Brais Fernández. Tamén inclúen un tema en italiano e outro dedicado aos refuxiados, que nos explica Marisol Palomo: "porque é o mesmo que a historia dos nosos pais e avós. A miña avoa veu cunha maleta metida no tren con tres fillos. É exactamente a mesma imaxe que vemos hoxe. Esa é a historia das catro de Ialma. Uns viñeron como mineiros, outros fuxiron da Guerra, outros foron fusilados, é como unha homenaxe á nosa historia e chamando a intentar cambiar o futuro".


Nos concertos, entre tema e tema, Marisol Palomo vai narrando as historias das súas familias a través dun diálogo entre nena e avoa. Nos directos contan tamén con Didier Laloy ao acordeón diatónico e Quentin Dujardin na guitarra e dirección artística, que tamén é o responsable da produción e dos arranxos do disco. 

As Ialma xa levan amosando por Europa este novo disco, con concertos en Bélxica, Austria e Francia, e a partir de febreiro poderemos velas en Galicia e en España comezando o 24 de febreiro na Casa de Rosalía (Padrón).